أحمد زعيم يكشف تفاصيل رحلته من المحاسبة إلى الغناء
أكد المطرب والملحن أحمد زعيم أن خوف والده وقلقه عليه انتهى بعدما شاهد خطوات نجاحه، وسعد بها كثيرًا، كما تطرق للحديث عن أغنيته الجديدة التي تحمل عنوان "بدعي عليك" وقصتها معه.
وجاءت تصريحات أحمد زعيم لبرنامج "سهرة نغم"، تقديم محمد بكر على نغم إف إم، على النحو التالي:
- بدأت حياتي محاسبًا، ووالدتي كانت بتحاول تقنعني أسيب الفن وأركز في أكل عيشي عشان خايفة عليا
- والدتي توفيت قبل شهرتي، لما كان عندي تاخت موسيقي بسيط في دمنهور، ووالدي كانت دائرة علاقاته موظفين، وما كانش فاهم إزاي ممكن أفتح بيتي من المزيكا، لأنه واخد على فكرة الشغل وقبض المرتب آخر الشهر
- كل خوف وقلق والدي راحوا لما شاف خطوات نجاحي، وبقى فرحان بيا جدًا.
- ورثت مزيج من الصفات من والدي اللي كان موظف، وبيصحى بدري وينزل يسعى عشان أكل عيشه، وأمي اللي كانت ربة منزل بسيطة وحياتها هادية، وأخدت منهم خفة الدم وحب النكت.
- من أهم نصايح والدي إني أعيش اللحظة، وما أشغلش بالي باللي فات ولا اللي جاي، وغرس فيا مقولة "ما بين طرفة عين وانتباهتها يغير الله من حالٍ لحال"
- أغنيتي الجديدة "بدعي عليك" ليها قصة غريبة معايا، اتكتبت واتغنت في 2018، بس ظهرت مؤخرًا بعد إعادة توزيعها من خماسي لمقسوم، وما نزلتش وقتها لأن مودها وفكرتها كانت مختلفة عن طبيعة الألبوم اللي نزل وقتها.
- أغنيتي الجديدة "بدعي عليك" فكرتها غريبة، لأن نادرًا لما راجل بيدعي على حبيبته، في حين إن الدعاء على الحبيب أمر أنثوي، بس أنا كنت حاسسها جدًا ومؤمن بالحالة والفكرة، والحمد لله وصلت للناس.
- على مدار مشواري الفني حصل تطور كبير، من شغلي كملحن بيجرب ألحان، وبجرب صوتي على الألحان اللي بيغنيها غيري، ومع كل استايل غنوة ولحن بحس إن فيه تغير في صوتي، وده حصل مثلًا في أغنيتين "يا عراف" و"حب تاني"، وفضلت أشتغل على صوتي وركزت لحد ما بقى ليه شخصية واضحة ومميزة.
- بعتبر نفسي شخصية حرة، لا تحب أن يقودها أحد أو يفرض عليها أي قرار، وفي المقابل أنا شخص بطيء في قراراته حاليًا بعد أن أخذت دروسًا كثيرة من التسرع زمان.
- أكثر وقت حسيت فيه بالوحدة بعد وفاة أمي، ومش بحب الوحدة بطبعي، لكن من وقت للتاني الإنسان بيحتاج للعزلة والهدوء لإعادة ترتيب أوراقه.
- كنت دائم التوتر والقلق زمان بطبعي، لحد ما اتعلمت التفاؤل مع الوقت بقربي من ربنا، وإيماني بقدره خيره وشره، وبدون إيمان مفيش طمأنينة، وأي إنسان لازم يعود نفسه على التفاؤل لحد ما قدره يتغير للأحسن.
