كشفت الفنانة ياسمين صبري عن رغبتها في تقديم دور شعبي وألا يحصرها المنتجون في دور الفتاة الراقية الأرستقراطية إنما تريد تقديم شخصيات متنوعة وأن تصل للجمهور في كل مكان وخاصة في المناطق الفقيرة.

وخلال حلولها ضيفة على جلسة حوارية ضمن فعاليات مهرجان البحر الأحمر السينمائي الدولي مساء أمس، قالت ياسمين صبري "الحاجات اللي بتتعرض عليا A Class مملة بالنسبة لي، لكني نفسي أعمل شعبي، والمنتجين يشوفوني في الحتة دي وحتى لو ما شافونيش فأنا برضه هعملها".

وأشارت ياسمين صبري إلى أنها تريد الوصول إلى كل الطبقات وهو مالم يحققه عرض الأعمال على المنصات الرقمية التي تتطلب اشتراكا للاستمتاع بخدماتها مضيفة "في ناس في الدلتا والفلاحين والصعيد، ما ينفعش أقول لهم علشان تشترك ادخل على كذا وادفع بالفيزا كارت، أنا عاوزة الجمهور ده عنده تليفزيون، عاوزة أروح له ومش عاوزة أصعبها عليه".

وتابعت ياسمين صبري "بقلق من المنصات لأن الناس دي مش هتروح لها، وهما شريحة كبيرة جدا في مصر وعلى راسنا، وبالرغم من التطور الشديد جدا للمنصات ولكن لسه فيه أماكن ما عندهاش رفاهية إنه يشترك علشان يتفرج وأنا مش عاوزة أكلف حد، وميزة التلفزيون إن أنت رايح له ببلاش وهتلاقي القهوة فاتحة قناة هوا".

أما فيما يتعلق بأفلام المهرجانات قالت ياسمين صبري إنها لا تفضلها وإنما تفضل الأفلام السينمائية مضيفة "أنا بنت شباك التذاكر، وبحب أن أتحدى نفسي بالمنافسة في الأفلام التجارية، ومسلسلات رمضان، لكن أفلام المهرجانات مش بتحقق إيرادات".

وعن أعمالها المقبلة قالت ياسمين صبري "بركز على أعمال في السينما في الفترة الجاية وهعمل فيلم جديد مع بيتر ميمي عن أول سوبر هيرو مصرية، والحمدلله أنا أملك ثقة كبيرة في عملي، وكل أعمالي السابقة حققت نجاحا وإيرادات.

وخلال الندوة تحدثت ياسمين صبري عن طريقتها في مواجهة ضغوط الحياة والعمل وقالت "أنا أسهل حاجة عندي الاستغناء، وده سلاح قوي ممكن الواحد يعمله في حياته".

وأضافت: "الحياة مش مستاهلة إن الواحد يقطع نفسه أو يعيش في ضغط، الحياة قصيرة جدا مهما طولت، والإنسان المفروض يعيش محترم نفسه وعنده راحة نفسية، وتكون رحيم مع نفسك. مش في سبيل دور تتعب نفسك نفسيا، وتتعامل مع ناس صعبة أو شرسة أو لسانها حاد، لا متشكرين جدا".

وتابعت: "اللي مكتوب لك هتشوفه سواء كده أو كده، وطول ما إنت بتشتري نفسك الدنيا هتشتريك".