كلمة حلوة وكلمتين.. حلوه يا بلدي
غنوة حلوة وغنوتين.. حلوه يا بلدي
التليفون يرن
الأم: رنت تليفونك بتقول انك متغربه
ليلي :(لنفسها) بصوت منخفض أمام المرآه
ما أنا متغربه (تضع ميكب ببطئ) متغربه من أول ما الطفولة سابتني ومِشيت وبدأت أواجه وأفهم حاجات كتير .
الام : خارجه يا ليلي.
ليلي : اه يا حبيبتي عندي شغل
الام : شغل ... اللي يسمعك يقول انك في شغل بحق وحقيقي
ليلي : معلش خليهم يصدقوا زي ما أنا بحاول اصدق
الام : ربنا يكرمك يا حبيبتي .
ليلي :أن شاء الله .... سلام .

ذكرايات كل اللي فات .. فاكرة يا بلدي
قلبي مليان بحكايات .. فاكرة يا بلدي

داخل كافيه
أستاذة ليلي أخدتي بالك من التعديلات :( العميل يتحدث).
معرفش ليه سرحت كدا النهارده وركزت في رنت التليفون
أنا :( بارتباك ) اه اه تمام ... بكرا باذن الله هيبقا عندك الورق بالتعديلات الجديدة .
العميل : تمام (يَهُم بالرحيل ) عن أذنك لان عندي شغل.
أنا :اتفضل ... أنا هكمل شغل هنا المكان جميل ورايق .
فتحت جهاز اللاب توب .. أكتر وقت بحبه واكتر وقت بيوجعني (الغروب)، حقيقة أدركتها مع السنين (أكتر حاجه هنحبها هي أكتر حاجه هتوجعنا ) قاعدة من قواعد الدنيا والوجود يمكن عشان نستوعب
ان مفيش حاجه اسمها اكيد وللابد .
أمامي النيل (فيو رائع) طلبت قهوة كمان و بدأت اسمع داليدا بشئ من التركيز .

ذكرايات كل اللي فات .. فاكرة يا بلدي
قلبي مليان بحكايات .. فاكرة يا بلدي

.. مش ناسيه حاجه
فاكرة الايام الحلوة كلها، أنا واخويا وبابا وهو رايح الشغل يودينا المدرسة ويجبنا وهو راجع
لمة العيلة يوم الجمعة عند جدي
طموحي في (الباسكت).

ذكرايات كل اللي فات .. فاكرة يا بلدي
قلبي مليان بحكايات .. فاكرة يا بلدي

2011 أيام الثورة كنت في ثانوية عام
ابن الجيران اللي كنت براقبه باهتمام
كان في رابعة كلية طب .. كنت بحب الحياة اللي في عيونه وكنت بحب نظراته ليا، حاجه جوايا كانت بتقولي انه بيحبني بس هو مقالهاش ... مات ابن الجيران في احداث الثورة ومشيوا الجيران من الشارع وبقا البيت مهجور وحاجه جوايا مهجورة بس معرفش هي ايه.
دخلت آداب انجليزي.
زي معظم الناس ... دخلت كلية مش بحبها وحاليا مترجمة (فريلانس) بعد سنين من محاولات ان اخد وظيفة استحقها كمعيدة داخل الجامعة لكن اخدها ابن الدكتور (عادي) اتفقنا ان في حاجه راحت مع ابن الجيران 2011
ادركت مع الوقت والسنين ان حماسي بقا مهجور زي بيته
وفهمت كويس اوي ان اللي بنحلم بيه هنا هيفضل حلم .

ذكرايات كل اللي فات .. فاكرة يا بلدي
قلبي مليان بحكايات .. فاكرة يا بلدي

النهارده 2 نوفمبر 2023 .. ازاي عدي 12 سنه في الروتين .. في اللاشيء.
فاكره الايام الصعبه بردو كلها ، بابا لما مات، أخويا لما سافر ويوم الجمعة اللي بقيت بقضيه أنا وماما لوحدنا .

كنا بنقول ان الفراق دا مستحيل .. وكل دمعة علي الخدين كانت بتسيل .
مليانه بأمل ان احنا نبقا موجودين .. في بحر الحب علي الشطين .

ربيع 2019 ... أمام باب المنزل

محمد : ماما بالله عليكي متصعبهاش عليا .
ماما : (بكاء شديد) يا ابني ايه لازمتها الغربة والشحطته وتسيبنا انا واختك لوحدنا من غير راجل .
محمد : ماما انتي متعرفيش انا عملت ايه عشان الاقي الفرصه دي ... عارفه كام واحد بيتمناها.. عاجبك وضعي شغال مندوب مبيعات زي الحمار طول الشهر وبيدخلي كام في الاخر !! ... أنا عندي 30 سنه يا امي هستني ايه تاني !! ... قلبي واجعني ان هسيبكم لوحدكم
بس والله في اقرب فرصه هبعتلكم تيجوا تعيشوا معايا هناك وليلي حبيبتي بمليون راجل ... مش كدا يا ليلي ؟.

2 نوفمبر 2023
الويتر : يا فندم يا فندم ..
أنا : (سرحانه) نعم في حاجه
الويتر : بقول لحضرتك تشربي حاجه تاني ؟
أنا : لا شكرا.
(داليدا) أو (يولاندا كريستينا جيجليوتي) فنانة ومغنية إيطالية مصرية، ولدت في شبرا لأبوين من المهاجرين وتعود أصولهما إلى شبه جزيرة كالابريا في جنوب إيطاليا.
فازت بلقب ملكة جمال مصر 1954
غنت بتسع لغات
انتشرت أغنياتها في عدة دول في أوروبا وأمريكا اللاتينية وأمريكا الشمالية وآسيا .
غنت بجانب عدد من المطربين المشهورين (جوني ماتيس)
(بيتولا كلارك) و (خوليو إجلسياس).
لديها أكثر من 1000 اغنية بلغات متعددة
نالت العديد من الالقاب والاوسمة .
وانتحرت بسبب نوبات الاكتئاب عام 1987

فين حبيب القلب يا بلدي ... كان بعيد عني يا بلدي
وكل ما بغني .... بفكر فيه .

ليلي انتي عندك 28 سنه جميلة ومتعلمة .. متجوزتيش ليه لحد دلوقتي ؟
اجابة تقلدية بقولها كل مرة .. لسه النصيب مجاش .
بس جوايا اجابة تانية .... انا نفسي احب واتحب اوي .

الساعة 7 مساءا داخل نادي (الزهور).

خلصت التعديلات ولقيت رجلي بتاخدني للنادي
من 10 سنين فاتوا كنت بتدرب هنا ، كنت شايفه ان هبقا أهم لاعبة (basketball) في مصر وهسافر واحترف في الدوري الامريكي.

الوضع الحالي بقيت باجي من وقت للتاني اتفرج علي التدريبات وارجع بالزمن كأنه ممشيش 10 سنين .

اثناء جلوسي في مدرج المشجعين
يابنتي يمينك يمينك(صوت عالي)
الصوت دا انا عارفاه كويس ... معقول !!
كابتن خالد هنا !!
فرحه، لخبطه وارتباك خلوني انزل واروح لمصدر الصوت
كأنه مشهد سينما
كابتن خالد قصادي بعد 10 سنين
الراجل اللي حبيته في مطلع العشرينات من عمري
اتمنيت جدا اتجوزه فيه كل حاجه بحلم بيها
كان مدربي واكبر مني ب7 سنين
يااااااااااا بجد الدنيا دي غريبه
انا : ازيك يا كابتن .. فاكرني ؟
خالد : يااا ليلي .. اكيد فاكرك .
اخبارك ايه وبتدربي ولا لسه ووصلتي لايه .
انا : جوايا بقول موصلتش لحاجه وياريت الزمن يرجع وكنت عرفت ان بحبك من قلبي بجد .
بس ردي كان : أنا بخير وللاسف بطلت اتدرب ... حضرتك رجعت من دبي امتي ؟
خالد : من كام شهر ... بس يا بنتي خسارة بطلتي ليه انتي كنتي موهوبة واكتر حد في الفريق منضبط.
أنا : جوايا مليون سؤال ، ياتري اتجوز ! طيب حب حد ! بيحب حد دلوقتي ! مفيش في ايده دبله .
أنا : اللي حصل بقا .

ذكرايات كل اللي فات .. فاكرة يا بلدي
قلبي مليان بحكايات .. فاكرة يا بلدي

رنت تليفونه ... صدفه غريبه
خالد : معلش دا (آدم) ابني .
أنا : حسيت بزلزال جوايا ومعرفتش اعمل ايه .... بسرعه قولتله : عن أذنك يا كابتن لازم امشي اتأخرت .
خالد : اتفضلي ولازم تعيدي تفكير وترجعي تدربي تاني .. هستناكي .
بعد الرحيل بخطوات وضعت (الايربوت)باذني وبدأت اشغل حلوة يا بلدي .... رنت تليفوني ... صوت داليدا
كلمات الشاعر (مروان سعاده).
رجعلتله وقلتله ... حضرتك عارف ان داليدا ماتت منتحره
خالد : اه سمعت بحاجه زي كدا .. بس ايه جاب السيرة !
بابتسامة بسيطه (ولا حاجه ) ومشيت.

كلمة حلوة وكلمتين
حلوة يا بلدي
غنوة حلوة وغنوتين
حلوة يا بلدي املي
دايما كان يا بلدي
اني ارجعلك يا بلدي
وأحسن دايما جنبك على طول
وذكريات كل اللى فات
فاكرة يا بلدي
قلبي مليان بحكايات
فاكرة يا بلدي
اول حب كان فى بلدي
مش ممكن انساه يا بلدي
فين ايام زمان قبل الوداع
كنا بنقول اني الفراق ده مستحيل
وكل دمعة على الخدين كانت بتسيل
مليانة بأمل أن احنا نبقى موجودين
فى بحر الحب على الشطين
كلمة حلوة وكلمتين حلوة يا بلدي
غنوة حلوة وغنوتين حلوة يا بلدي
فين حبيب القلب يا بلدي
كان بعيد عني يا بلدي و كل ما بغني بفكر فيه
قول يا حبيبي انت سايبني ورايح فين
أجمل لحن ده هنغني احنا الاتنين
يا ما احلى كلمة بلدي فى غنوة بين سطرين
يا ليل يا عين يا عين يا ليل
يا ليلي يا ليلي ليلي
كلمة حلوة وكلمتين حلوة يا بلدي
غنوة حلوة وغنوتين قمر يا بلدي
املي دايما كان يا بلدي
اني ارجعلك يا بلدي
وأحسن دايما جنبك على طول
قمر يا بلدي حلوة يا بلدي