مها صابر تكتب: عُقد سنين
العمر عد السنين
بس السنين ماعادِتش
بتعدي زي الموج
عالي ومابينزلش
ياخد في وشه الفرح
ويخاصم اللي انجرح
يفضلْ لي من اللي انطرح
هم في وداني يوِّش
لضمت من اللي فضل
وعملت "عُقد سنين"
لفيت رقابتي بها
وبعيد عن السامعين
لهاليب وقايدة نار
بتصعب المشوار
قطة وماسكة الفار
ترميه شمال ويمين
لميت سنين الزمن
وعملت منها حجاب
وحسبت إيه كان تمن
ومين يرد جواب
على كام سؤال اتسأل
ومين لأمره امتثل
لقيت جواب في المثل
"اللي عليه العوض
فيما اخد أو جاب"
لميت سنين الزمن
ووصلت للآخر
الوِحدة كانت ونس
ولا راضية تتاخر
سلمت للرحمن
ودعيت في كل آدان
على كل ظالم خان
واللي يغشْ الوشْ
العمر عد السنين
بس السنين ماعادتش
